ناس وناس

هناك ناس سماعها موزيقة
وهناك ناس نطقها حريقة
لا شافها التعبان غير طريقه
ترياقها مسموم مدرق عيبه
******

هناك ناس فطبعهم علة
وهناك ناس ما تشد عليهم زلة
تضحك قبالة وفي الخفاء معتلة
تحمل همومك حملتك لحبيبة
******
هناك ناس حسها ممتاز
وهناك ناس لو لّحنِّتها نشاز
تحذف رشاد وبيتها من قزاز
تعّجِب اوتارك وعودها علي صيبة
******
هناك ناس ما تقبلهم
وهناك ناس ما ليهم وطا تحملهم
ميزانهم بالقدر خفيف حملهم
إن دمعك سكايب صار طريبة
******
هناك ناس تودهم بالوافي
وهناك ناس من بعيد سلامك كافي
كان قّربِت تِبعد الخير فيافي
تضايق الخلق بدون سبيبة
******
هناك ناس فكك منهم
وهناك ناس ما تقدر تفارق عنهم
لعيبك يداروا يزينه منظرهم
تملك القصر وسكنتك فزريبة
******
هناك ناس فصبحهم تتيسر
وهناك ناس شبحهم لبعيد يكشر
لا تبان تخطاها وتضرب مخطر
تهيف عليك ففرح يقلب مصيبة
******
هناك ناس بخفة هبي
وهناك ناس باسلة كيف الدي
تحصل فحلقك ما يسرحها مي
حصلة حرافة مرة بو لربيبة
******
هناك ناس برغيها تغص
وهناك ناس كلمتين وقص
توزن مقاسك ما تخيب مقص
تكسب الود بالقدو والترحيبة
******
هناك ناس أوناس
وهناك ناس قصقصة بسباس
كاسرين الودن ساس فساس
دوارة لعيب يبان للتعجيبة
******
هناك ناس ما ينطاقوا
وهناك ناس من زنينك طابوا
تزعل بكلمة بنصها يرطابوا
إن جرحك نزف يبروه بِتبطيبة
******
هناك ناس تخجل منهم
وهناك ناس في السر ما تامنهم
تقصع فجُرة وانت غافل عنهم
لا فاح كرمك يسكروا من زبيبه
******
هناك ناس ياك لا باس
تختار وخيارك دليله احساس
والفايدة في القدر بين الناس
غربل الخايب والقط الباهي سريبه

******

                                                              

طرابلس 21 September 2015